A campaña de verán de limpeza e roza do rural compostelán xa está en marcha e desenvolverase entre este mes de maio e mediados de setembro cun calendario de actuacións que chegará ás 29 parroquias da área rural do municipio. Os traballos, coordinados pola Concellería de Rural, arrancaron esta semana na parroquia de Figueiras e continúan desde este xoves en Villestro.
Como xa ocorrera na campaña do ano pasado, o inicio dos labores non se realizou na mesma parroquia que en edicións anteriores, senón que se acordou un sistema rotatorio resultado do diálogo mantido entre o Concello e a veciñanza a través da Federación Rural (Ferusa). No verán de 2025 os traballos comezaran en Santa Cristina de Fecha, mentres que nesta ocasión a primeira actuación correspondeu a Figueiras.
A campaña abrangue a limpeza e roza de 500 quilómetros de vías municipais, así como parcelas de titularidade pública distribuídas polo conxunto do rural compostelán. Para executar estes traballos, o Concello combina medios mecanizados con actuacións de carácter manual nas zonas máis complexas ou de difícil acceso.
Segundo explicou o goberno local, nas tarefas previstas non se empregan herbicidas, apostando por métodos alternativos para o mantemento da vexetación.
Durante o mes de maio, ademais das intervencións en Figueiras e Villestro, está previsto actuar tamén na parroquia de Laraño, uns traballos que se prolongarán durante o mes de xuño. A continuación, a campaña avanzará progresivamente polo resto das parroquias ata mediados de setembro.
O executivo municipal indicou que o calendario completo das actuacións será comunicado na próxima reunión do Consello Municipal de Rural, órgano no que participan diferentes representantes vinculados ao territorio rural compostelán.
Unha vez rematada esta primeira fase estival, o Concello prevé desenvolver unha segunda campaña durante o outono, coa intención de volver actuar sobre áreas nas que xa se realizasen intervencións no verán para garantir o mantemento das condicións de limpeza.
