O Ministerio de Sanidade e a Universidade de Santiago de Compostela impulsan unha nova iniciativa formativa centrada na aplicación da intelixencia artificial ao ámbito sanitario. Trátase da Microcredencial Universitaria en Intelixencia Artificial aplicada á Saúde: fundamentos, regulación e casos de uso no Sistema Nacional de Saúde, promovida a través da cátedra USC-Plexus de IA en Medicina Personalizada de Precisión (CAMELIA).
O programa nace co obxectivo de reforzar as capacidades do ecosistema sanitario no uso desta tecnoloxía e facilitar unha incorporación “cohesionada e equitativa” das solucións de intelixencia artificial ao sistema público de saúde. Segundo sinalou a directora xeral de Saúde Dixital e Sistemas de Información para o SNS do Ministerio de Sanidade, a formación e a capacitación constitúen “un elemento clave” dentro da Estratexia de Intelixencia Artificial do Sistema Nacional de Saúde.
A primeira convocatoria da microcredencial espertou interese entre profesionais e responsables do ámbito sanitario, polo que xa está prevista unha segunda edición para outubro de 2026. O director da cátedra CAMELIA, Senén Barro, destacou que a medicina estará “cada vez máis apoiada pola intelixencia artificial”, aínda que advertiu de que “non será mellor se os profesionais sanitarios non están preparados para usala”.
Pola súa banda, o CEO de Plexus Tech, Antonio Agrasar, incidiu en que o desafío non pasa unicamente polo desenvolvemento tecnolóxico, senón tamén pola súa utilización “con coñecemento e criterio”. Neste sentido, definiu a microcredencial como “un paso fundamental” para achegar a intelixencia artificial á práctica sanitaria diaria.
FORMACIÓN PRÁCTICA E CASOS REAIS
O programa está orientado principalmente a responsables e persoal de xestión, facultativos e especialistas en transformación dixital do sistema sanitario público. A formación abordará cuestións vinculadas á adquisición e uso da intelixencia artificial na sanidade pública desde unha perspectiva práctica e aplicada.
Entre os contidos previstos inclúense casos de uso reais, experiencias de desenvolvemento propio nos servizos de saúde, modelos de gobernanza da IA no Sistema Nacional de Saúde, así como aspectos regulatorios, éticos e relacionados co despregamento destas ferramentas.
A microcredencial contará coa participación de profesorado e especialistas procedentes de distintas institucións vinculadas á saúde dixital e á regulación tecnolóxica, entre elas o Ministerio de Sanidade, a USC, a Agencia Española de Medicamentos y Productos Sanitarios e o Centro Nacional de Certificación de Produtos Sanitarios.
