O Concello de Santiago vén de aprobar en Xunta de Goberno Local a modificación do proxecto de execución da primeira fase da reurbanización da rúa García Lorca, no barrio de Vite, unha actuación que implicará un investimento adicional de 117.993,75 euros e que ampliará en dous meses o prazo previsto para a súa finalización, situando o remate das obras no 22 de abril de 2027.
O concelleiro de Obras, Xesús Domínguez, trasladou esta semana esta información directamente á veciñanza nun encontro celebrado no barrio, no marco da rolda de reunións que o goberno local está a desenvolver en distintas zonas do municipio para abordar demandas cidadás e informar sobre actuacións municipais en marcha.
Segundo explicou o edil, a modificación responde á necesidade de retirar unha tubaxe de fibrocemento con formigón localizada na canalización do alumeado público, unha intervención considerada necesaria para garantir a continuidade da obra e avanzar na rehabilitación integral da vía.
A actuación forma parte da primeira fase da reurbanización de García Lorca, un proxecto destinado a renovar esta rúa de Vite e adaptar as súas infraestruturas ás necesidades actuais.
REUNIÓNS EN BARRIOS E PARROQUIAS
A xuntanza en Vite enmárcase na dinámica de encontros impulsada nas últimas semanas pola alcaldesa, Goretti Sanmartín, xunto cos concelleiros de Obras e de Rural e Relacións Veciñais, Pilar Lueiro, en distintos puntos do concello.
Neste contexto, o executivo local mantivo tamén reunións con veciñanza de Santa Cristina de Fecha, Vidán e con representantes da Asociación Veciñal Monte de Deus, ademais dunha recente visita a Bálsoma, co obxectivo de coñecer de primeira man preocupacións e necesidades tanto dos barrios urbanos como das parroquias.
Estas xuntanzas buscan reforzar a interlocución directa coa cidadanía sobre cuestións vinculadas a infraestruturas, servizos e planificación municipal.
