A alcaldesa de Santiago, Goretti Sanmartín, e a nova reitora da Universidade de Santiago de Compostela, Rosa Crujeiras, escenificaron este martes no Pazo de Raxoi a vontade compartida de consolidar e ampliar a colaboración entre ambas institucións nunha primeira visita oficial marcada pola continuidade dos proxectos xa iniciados e pola apertura de novas vías de cooperación estratéxica para a cidade.
Crujeiras, primeira muller en asumir o reitorado da USC, asinou no Libro de Honra do Concello nun acto institucional no que ambas responsables puxeron o foco no papel da universidade como motor social, económico e cultural de Compostela. Sanmartín subliñou que a USC é “unha parte fundamental de Santiago de Compostela” e incidiu na necesidade de manter unha folla de ruta común que permita trasladar o coñecemento xerado pola institución académica ao conxunto da sociedade compostelá.
A rexedora destacou que o traballo conxunto desenvolvido nos últimos anos xa deu lugar a colaboracións en ámbitos como o modelo turístico, o deseño de estratexias verdes, a loita contra o cambio climático, a igualdade ou a economía social, e avanzou que o obxectivo pasa agora por reforzar esas liñas co novo equipo reitoral. “O interese para nós é fundamental seguir adiante nesa colaboración”, sinalou, incidindo tamén na coordinación política e técnica entre Concello e universidade.
Pola súa banda, Crujeiras reivindicou o papel histórico da USC na construción da identidade compostelá e defendeu unha universidade máis conectada coa cidadanía. “Temos moito máis que ofrecer a esta cidade”, afirmou, apostando por fortalecer a transferencia de coñecemento cara ao tecido social, cultural e produtivo de Santiago. A reitora fixo fincapé en sectores como a creación de empresas de base tecnolóxica, o emprendemento e a innovación como posibles áreas prioritarias para contribuír á diversificación económica local.
CAMPUS SUR, VIVENDA E CULTURA ENTRE OS ASUNTOS PRIORITARIOS
Entre os temas concretos abordados na reunión figuraron cuestións históricas como a ordenación e mellora do Campo Sur, un espazo sobre o que Concello e USC levan anos traballando a nivel técnico. Sanmartín explicou que existen avances relacionados coa segregación de parcelas, a definición de titularidades e a cuantificación económica das actuacións, aínda que advertiu da complexidade administrativa do proceso.
Outro dos puntos centrais foi o acceso á vivenda, especialmente para o estudantado, nun contexto marcado pola futura declaración de Santiago como zona de mercado residencial tensionado. A alcaldesa apuntou que esta ferramenta pode contribuír a facilitar a residencia estudantil na cidade e evitar desprazamentos cara a outros municipios.
No eido cultural, Crujeiras avanzou a intención do novo equipo de goberno da USC de abrir máis os espazos universitarios á cidadanía e entender a cultura como un dereito compartido. A reitora sinalou que, ademais das colaboracións xa consolidadas, existen novas posibilidades para fortalecer a relación entre campus e cidade a través de proxectos culturais e espazos de convivencia.
“A UNIVERSIDADE É UNHA VACINA CONTRA O NON-LUGAR”
Na súa mensaxe no Libro de Honra, Crujeiras definiu Santiago como unha cidade cuxa identidade está profundamente vinculada á universidade. A reitora advertiu sobre o risco dos “non-lugares”, espazos sen identidade recoñecible, e asegurou que Compostela conserva a súa singularidade precisamente grazas ao papel da USC. “A universidade é xustamente unha vacina contra o non-lugar”, afirmou.
Preguntada polo simbolismo de ser a primeira muller en ocupar o cargo, Crujeiras restou excepcionalidade ao feito, aínda que recoñeceu a súa relevancia simbólica. “Non será a última”, asegurou, expresando o desexo de que no futuro a presenza feminina en postos de máxima responsabilidade deixe de ser noticia.
A recepción en Raxoi serviu así para visualizar unha nova etapa nas relacións entre o Concello e a USC, marcada pola vontade de continuidade, a cooperación institucional e a aspiración compartida de converter o coñecemento universitario nunha ferramenta útil para o desenvolvemento de Santiago.
