A catedrática de Óptica da Universidade de Santiago de Compostela, Maite Flores Arias, foi nomeada nova presidenta da Sociedade Española de Óptica (Sedóptica) para os próximos tres anos, converténdose na máxima responsable desta entidade estatal dedicada á investigación e promoción da óptica e a fotónica. Flores sucede no cargo ao catedrático da Universidade de Salamanca Luis Plaja Rustein, tras ocupar previamente a vicepresidencia da organización.
A nova presidenta de Sedóptica desenvolveu unha ampla carreira vinculada á USC, tanto no ámbito investigador como na xestión universitaria. Ao longo da súa traxectoria foi presidenta da Comisión Interuniversitaria de Galicia (CIUG), delegada do reitor para o Ensino Medio, coordinadora do programa Stembach, directora do Departamento de Física Aplicada e impulsora do Instituto de Materiais da USC (iMATUS). Na actualidade coordina tamén a infraestrutura singular L2A2 (Laboratorio Láser para a Aceleración e outras Aplicacións), unha das principais instalacións de láser ultraintenso do Estado.
No ámbito científico, Flores Arias conta con máis de 300 publicacións internacionais e unha extensa participación en congresos especializados, ademais de tres patentes e experiencia empresarial como cofundadora de BFlow S.L. A súa actividade abrangue tamén a avaliación científica e universitaria, formando parte de distintas axencias autonómicas e estatais, así como de organismos internacionais de investigación en países como México e Polonia.
A investigadora compostelá tamén participou en órganos de dirección da Sociedade Europea de Óptica e foi recoñecida como membro distinguido tanto nesta entidade como na Sociedade Americana de Óptica. En 2019 recibiu o Premio de Transferencia de Tecnoloxía en Galicia concedido pola Real Academia Galega de Ciencias.
Sedóptica, fundada en 1968, constitúe a principal plataforma estatal para investigadores, universidades e empresas vinculadas ao sector óptico. A entidade, patrocinada polo CSIC, integra unha ampla rede científica estruturada en dez comités especializados en áreas como óptica cuántica, nanofotónica, espectroscopía, ciencias da visión ou ensino da óptica, ademais de seccións centradas na mocidade e na promoción da muller na ciencia.
