A Consellería de Infraestruturas anunciou un cambio na planificación das obras da nova senda peonil e ciclista que conectará Milladoiro coa Intermodal de Santiago. A montaxe da pasarela, inicialmente prevista para estas datas, realizarase finalmente este xoves, 12 de marzo, o que obrigará a establecer un corte puntual de tráfico na ligazón que une a autovía AG-56 coa SC-20 e a AP-9 en sentido Santiago.
Esta restrición da circulación resulta imprescindible para garantir a seguridade durante as manobras de elevación e instalación da estrutura no punto quilométrico 1,39 da nova senda, zona que debe permanecer despexada e baixo medidas especiais de control. O Executivo autonómico fixou a nova previsión de afección ao tráfico unicamente para esta xornada do xoves, cun horario ininterrompido entre as 9,00 e as 20,00 horas. Os servizos técnicos de estradas solicitan aos usuarios que presten atención á sinalización provisional instalada na zona para facilitar a fluidez durante as horas de traballo.
