O presidente da Xunta, Alfonso Rueda, desprazarase o vindeiro sábado 14 de marzo a Suíza para manter un encontro coa colectividade galega, segundo avanzaron fontes de Presidencia do Goberno galego.
En concreto, reunirase con representantes das entidades radicadas no país e, ademais, asistirá ao encontro en Zúric ‘Galicia Calidade’, que a Administración autonómica organiza en colaboración coa asociación As Xeitosiñas con motivo do seu 45 aniversario.
Trátase dun evento que combina música, gastronomía e cultura desde as 17.00 ata as 22.00 horas. Contará con diferentes actuacións musicais –entre elas, a orquestra París de Noia– e inclúe unha cea especial con produtos galegos. As 1.000 entradas a distribuír xa se esgotaron.
A Xunta inscribe a visita no “contacto fluído” que mantén coas entidades galegas do exterior, que exercen un papel fundamental nas súas comunidades e á hora de manter vivo o vínculo co Galicia. “Ese compromiso da Xunta reflíctese a través de visitas e reunións, pero tamén en axudas á colectividade ou iniciativas como ‘Galicia Retorna'”, engade.
ENCONTRO CON ISABEL DOBARRO
Por outra banda, Rueda mantivo unha reunión esta semana coa pianista Isabel Dobarro para felicitala en persoa pola súa Grammy latino. A pianista compostelá recibiu o premio a Mellor Álbum de Música Clásica o 12 de novembro polo seu traballo ‘Kaleidoscope’. É a primeira en gañar nesta categoría e a cuarta en facelo de forma xeral.
No encontro, o presidente trasladoulle a Dobarro o interese da Xunta por “continuar traballando en que a música sexa unha ferramenta con himanto social e cada vez máis igualitaria” e a invató a traballar conxuntamente en eventos do Xacobeo 2027.
