A sección compostelá da Audiencia Provincial da Coruña celebrará o vindeiro xoves, día 5, o xuízo contra un home ao que a Fiscalía atribúe un delito continuado de falsidade documental e outro de estafa, polos que pide unha pena conxunta de catro anos de prisión.
Segundo recolle o escrito de acusación do Ministerio Fiscal, os feitos remóntanse ao ano 2022. O procesado, que actuaba como intermediario habitual na compravenda de vehículos e carece de antecedentes penais, tería percibido 25.305 euros nunha operación coa empresa Vayper automoción que, de acordo coa acusación pública, non se desenvolveu nos termos pactados.
De acordo coa versión da Fiscalía, en setembro de 2022 o acusado remitiu un correo electrónico ao administrador mercantil da empresa no que detallaba unha oferta de venda de cinco vehículos. O orzamento incluía un Audi A5 por 14.500 euros, un Seat León por 12.500 euros, un Smart Four por 2.500 euros, un Nissan Qashqai por 6.990 euros e un Volkswagen Tiguan por 16.900 euros.
O importe total da operación ascendía a 53.390 euros. Tras aceptar a proposta, o administrador procedeu a realizar o ingreso da cantidade acordada nunha conta bancaria titularidade do acusado.
Sempre segundo o relato do Ministerio Público, unha vez recibido o diñeiro, o intermediario fixo entrega de tres dos vehículos ofertados —o Smart, o Nissan Qashqai e o Seat León— en lugar dos cinco inicialmente incluídos na oferta.
Ademais, a Fiscalía sostén que as facturas correspondentes foron “manipuladas”, modificándose “a data de emisión das mesmas así como o prezo dos vehículos de forma que se reducía notablemente o seu importe”, co obxectivo de alterar as condicións económicas da operación.
Por estes feitos, o Ministerio Fiscal considera que os feitos son constitutivos dun delito continuado de falsidade documental e doutro de estafa. Xunto á pena de prisión, solicita tamén a imposición dunha multa de doce meses cunha cota diaria de dez euros.
En concepto de responsabilidade civil, a acusación interesa que o procesado indemnice ao administrador de Vayper automoción na contía de 25.305 euros, correspondente á cantidade que, segundo a Fiscalía, non foi compensada coa entrega efectiva dos vehículos.
