O presidente ‘popular’ da Xunta de Galicia, Alfonso Rueda, atribuíu a Vox o denominado “voto do cabreo”, en referencia ao “hartazgo” dos cidadáns coa situación política actual que, en lugar de optar polo PP, deciden apoiar á formación liderada por Santiago Abascal.
Nun acto organizado por ‘The Objective’, –ao que tamén asistiron o alcalde de Madrid, José Luís Martínez-Almeida; a expresidenta da Comunidade de Madrid Esperanza Aguirre e o presidente do Senado, Pedro Rollán, entre outros– Rueda sinalou que o transvasamento de votos cara a Vox responde, na súa opinión, a un “hartazgo a nivel nacional” polo que está a ocorrer en España.
“É un voto que está a reaccionar fronte ao que está a pasar no país”, afirmou o presidente da Xunta, subliñando que se trata dunha forma de “desafogo” por parte dalgúns cidadáns.
A VÍA RÁPIDA PARA DICIR: ‘PARA XA’
Así, o ‘popular’ explicou que este comportamento electoral supón para algúns votantes “a vía rápida de dicir ‘para xa’, que se acabe o que hai en nivel nacional”, apostando por unha alternativa como forma de protesta. “É o voto do cabreo, o desafogo”, resumiu.
No entanto, defendeu que, aínda que este tipo de voto é “absolutamente respectable” e responde a decisións adoptadas “en conciencia”, non o considera a opción máis “oportuna” para propiciar un cambio político.
Neste sentido, Rueda argumentou que se o obxectivo é cambiar o Goberno, a vía adecuada é apoiar ao partido que ten posibilidades de encabezar o Executivo. “Se ti queres que cambie a situación que temos en España, creo que o mellor é votar ao partido que, sen ningunha dúbida, vai entrar no Goberno”, afirmou.
Ao seu xuízo, o Partido Popular segue sendo a forza que “gaña as eleccións” e a que pode liderar unha alternativa, fronte a outras opcións que, segundo apuntou, manteñen unha posición máis “cómoda e populista” ao non asumir responsabilidades de goberno.
