A candidata a reitora da USC Rosa Crujeiras anunciou este martes que o catedrático Luís Míguez xa non formará parte da súa candidatura. Fíxoo a través da súa conta na rede social Instagram, onde subliñou que é ela “quen lidera e quen dirixe este proxecto”.
“Como parte dun equipo que quere avanzar cara a unha USC feminista, inclusiva e comprometida. Agora falemos de programas...”, concluíu. Todo iso despois de que o sindicato estudantil Fervenza e estudantes da USC –que crearon unha conta na rede social Instagram para informar o proceso electoral– fixéronse eco do contido dun blogue persoal de Míguez.
Segundo detallou o sindicato, o antigo decano da facultade de Dereito referíase no ano 2006 ao matrimonio homosexual como “un plan” do presidente Zapatero para “afundir a España no ridículo e no descrédito mundial”. A maiores, acusouno de difundir na época do bipartito que en Galicia existía unha “intolerable imposición lingüística“, discursos que “non poden ter cabida nas institucións educativas”, afeou Fervenza.
Pola súa banda, os estudantes referíronse a “un patrón reiterado de discursos excluíntes, con expresións homófobas, contrarias a dereitos fundamentais e incompatibles cos valores da universidade pública”. Con todo, Crujeiras insistiu en que “non o comparte” e asegurou que Míguez xa non formaría parte do seu equipo.
