A alcaldesa de Santiago, Goretti Sanmartín, afirmou que o Consistorio espera recibir “ao longo desta semana” a proposta de convenio marco por parte da Xunta para a reordenación da contorna do Hospital Clínico de Santiago, un documento no que se priorizará, dixo, a construción do novo aparcadoiro do CHUS, aínda que eludiu “pór prazos”.
Este foi un dos temas que a rexedora abordou este luns na súa reunión co Foro Cívico, unha cuestión que, dixo en declaracións aos medios ao terminar, suscitou “moito interese” neste colectivo que agrupa distintos sectores da cidade. O Foro, dixo Sanmartín, trasladoulle que se trata de algo “imprescindible” e instoulle a “falar de prazos”, algo que ela descartou.
A rexedora si contou que esperan recibir ao longo desta semana a proposta de convenio marco por parte da Xunta. “E, a partir de aí, iremos facendo xa os convenios, esperando, sen ningunha dúbida, polo tema tanto do aparcadoiro como dalgúns accesos que xa están con posibilidade de facerse”, dixo a alcaldesa. No entanto, engadiu, “como desa licitación e desa contratación, quen se vai a encargar é a Xunta”, rexeitou “pór prazos”.
Pola súa banda, Carlos García, portavoz do Foro Cívico, sinalou que este acordo en relación ao parking do CHUS “pon de manifesto” que “cando hai colaboración e apoio unánime dos grupos políticos, chégase a acordos e a cidade crece”.
PARCELA DE PELETEIRO
Neste caso, apuntou, “salváronse esas pequeñeces políticas en aras dun proxecto importante e necesario” para a cidade, algo que animou a repetir no caso da parcela de Peleteiro. “Estivemos tanto tempo dándolle voltas a unha margarida que, de tanto esfollar, quedamos no punto de partida, é dicir, co peor proxecto que temos encima da mesa.
Na reunión entre a alcaldesa de Santiago e o Foro Cívico tamén saíu a parcela de Peleteiro, sobre a que Goretti Sanmartín mencionou a reunión que manterán co Goberno o vindeiro venres para tratar de desbloquear un proxecto alternativo para a parcela. “Hai que tentar que haxa un movemento por parte do Estado que poida influír en que haxa unha solución de plan diferente”, dixo, en declaracións aos medios.
