A candidata á Reitoría da Universidade de Santiago de Compostela, Alba Nogueira, reuniuse este luns coa alcaldesa de Santiago de Compostela, Goretti Sanmartín, nun encontro de carácter privado no que se abordaron diferentes iniciativas para fortalecer a relación estratéxica entre a institución académica e o Concello.
A xuntanza enmárcase na rolda de encontros que a rexedora municipal mantén con todas as persoas candidatas á Reitoría da USC. A alcaldesa suspendeu a súa axenda oficial durante a xornada do luns con motivo do accidente ferroviario ocorrido en Adamuz, en Córdoba, mantendo unicamente este tipo de reunións institucionais xa programadas.
Durante o encontro, Alba Nogueira expuxo parte do seu programa centrado en mellorar as necesidades de aloxamento e de mobilidade da comunidade universitaria. Nese contexto, sinalou que, de resultar elixida, traballará por unha universidade cunha presenza activa na cidade: “Como reitora traballarei por unha universidade activa e comprometida coa súa contorna. Queremos que o modelo caminable e con pacificación do tráfico inclúa os campus da USC”.
A candidata defendeu a necesidade de mellorar a articulación dos campus coa cidade, propoñendo un plan de mantemento, sinalización e humanización que contribúa a dotalos de maior vida universitaria e integración no tecido urbano compostelán.
Outro dos eixos tratados foi a vinculación do Consorcio da cidade en actividades universitarias e nos procesos de rehabilitación de inmobles da USC. Nogueira trasladou a importancia dunha maior implicación institucional: “Tamén buscamos unha implicación decidida das tres administracións do Consorcio na rehabilitación dos edificios históricos da Universidade”.
Neste ámbito, cualificou de “fundamental” a negociación dunha liña específica de financiamento para o mantemento e a rehabilitación do patrimonio histórico-artístico da USC. Ademais, apuntou á posibilidade de alcanzar acordos cos concellos e coa Igrexa para recuperar grandes espazos actualmente “infrautilizados”, co obxectivo de destinalos a residencias universitarias.
Por último, a candidata á Reitoría tamén propuxo estudar o uso compartido de infraestruturas universitarias, como auditorios ou instalacións deportivas, para que poidan abrirse á veciñanza de Santiago, favorecendo así unha maior conexión entre a universidade e a cidade.
