O reitor da Universidade de Santiago de Compostela, Antonio López, xustificou este mércores o cesamento de Maite Flores, candidata a reitora da USC, das súas funcións na Comisión Interuniversitaria de Galicia (CIUG). Segundo López, esta decisión tomouse por ser “a mellor solución para garantir a máxima igualdade” entre todas as persoas que aspiran a ocupar a rectoría da institución académica.
Ata este luns, Flores exercía como delegada do actual reitor na CIUG. Tras coñecerse a noticia, a candidata amosou a súa sorpresa e vinculou directamente o seu cesamento co paso dado para presentarse ás eleccións. Pola súa banda, o reitor lembrou que outras candidatas que ocupaban postos de responsabilidade na universidade xa optaron por renunciar, como é o caso da ata agora vicerreitora de Titulacións, María José López Couso, e defendeu que no caso de Flores se aplicou “unha medida similar para garantir que haxa igualdade entre todo o mundo e a máxima transparencia“.
Neste contexto, Antonio López insistiu en que mantivo dúas conversas sobre este asunto coa propia candidata —unha o pasado venres e outra este luns— e desmentiu que Flores fose informada do seu cesamento a través dun correo electrónico, tal e como ela sostivo publicamente.
O actual reitor tamén aproveitou para lembrar que a Comisión Electoral Central (CEC) da USC enviou este martes unha advertencia formal a Maite Flores por “incumprir” as normas do proceso electoral. Segundo recolle a resolución da CEC, a candidata “aproveitou” unha canle de comunicación institucional para facer precampaña, unha práctica que vulnera a normativa fixada para os comicios universitarios.
