A sección sexta da Audiencia Provincial da Coruña, con sede en Santiago de Compostela, acollerá a partir deste luns un xuízo contra un profesor acusado dun delito continuado contra a liberdade sexual. Segundo o escrito do Ministerio Fiscal, a vítima é un alumno home que, no momento dos feitos, era menor de 16 anos. A vista está sinalada para os días 12, 14, 15 e 16 de xaneiro e, dada a natureza do delito e a idade da vítima, celebrarase integramente a porta pechada.
Os feitos denunciados tiveron lugar nun centro educativo da capital galega entre os anos 2021 e 2022. A Fiscalía incide na súa acusación na situación de especial vulnerabilidade do menor por razón da súa idade e no seu escaso desenvolvemento físico. Así mesmo, o Ministerio Público sinala que o acusado actuou con prevalecemento, aproveitando a súa situación de superioridade ao ser o mestre do alumno.
Por estes feitos, a Fiscalía pide para o docente unha pena de seis anos de cárcere. Ademais da privación de liberdade, solicita que se lle impoñan outros seis anos de liberdade vixiada unha vez saia de prisión. A petición inclúe a prohibición de comunicarse ou aproximarse á vítima a menos de 500 metros durante un período de 10 anos. Finalmente, o ministerio fiscal reclama 12 anos de inhabilitación especial para calquera profesión ou oficio, sexa ou non retribuído, que supoña o contacto regular e directo con persoas menores de idade.
