Os Reis Magos de Oriente, Melchor, Gaspar e Baltasar, acompañados polos seus paxes, aterraron este luns, cinco de decembro, no Aeroporto de Santiago-Rosalía de Castro, nunha xornada marcada pola ilusión infantil e os preparativos previos á noite máis agardada do Nadal. A chegada produciuse pasadas as 11:00, nun voo procedente de Oriente.
En terra agardábaos a alcaldesa de Santiago, Goretti Sanmartín, xunto con representantes dos grupos municipais. Á saída da terminal, un grupo de nenos e nenas recibiu á comitiva con cartas de última hora, saúdos e fotografías, antes de que As súas Maxestades se desprazasen ao Espazo Cultural do aeroporto.
Alí, arredor de corenta menores déronlles a benvida entre aplausos e pancartas con mensaxes como ‘Reis Magos, esta noite queremos soñar’ ou ‘Benvidos á nosa terra, podedes aterrar’. Melchor, Gaspar e Baltasar sentáronse para atender persoalmente aos rapaces, recoller as misivas atrasadas e escoitar os seus desexos. Mentres, os paxes repartiron caramelos e un libro de agasallo elaborado por Aena.
Entre as peticións máis repetidas figuraron libros, xogos de mesa, cartas Pokémon, a Nintendo Switch ou bonecas das Guerreiras K-pop, aínda que tamén houbo solicitudes menos materiais, como “ter un ano feliz” ou “saúde para a familia”. Moitos dos nenos aseguraron que “se portaron moi ben este ano” ao facer a súa entrega.
En declaracións aos medios, o Rei Meigo Gaspar afirmou que “lles gusta” regresar a Galicia, destacando a visita á Catedral de Santiago e a gastronomía local. Tras o acto no aeroporto, os Reis Magos anunciaron que descansarán unhas horas antes da Cabalgata, xa que lles agarda unha noite “moi atarefada”. “O avión vén cargado de agasallos e creo que veñen outros 20 ou 30 máis de camiño”, sinalou Gaspar.
Antes de despedirse, As súas Maxestades lembraron aos nenos a importancia de “seguir portándose tan ben como este ano” e de “deitarse cedo” para facilitar o reparto de agasallos durante a noite.
