A Xunta de Galicia valorou de forma positiva que a Universidade de Santiago de Compostela (USC) dese finalmente o seu visto e prace ao acordo para a descentralización dos estudos de Medicina, un pacto alcanzado a finais de novembro entre o Goberno galego e as universidades públicas. Segundo confirmou o Executivo autonómico, este paso permite manter o calendario previsto e convocar a primeira comisión de seguimento no mes de xaneiro.
As consellerías de Sanidade e Educación difundiron un comunicado conxunto no que salientan que a USC resolveu as súas discrepancias internas, que nas últimas semanas deixaran en suspenso o proceso. A negativa inicial da Facultade de Medicina provocara un bloqueo temporal que agora queda superado tras o cambio de posición adoptado este xoves polo centro, o que permitiu á universidade compostelá aprobar o convenio.
O Goberno galego sinala que esta decisión supón validar o acordo acadado entre as universidades para avanzar na descentralización da titulación. Ata o de agora, a Universidade da Coruña (UDC) xa expresara o seu apoio, polo que só resta o pronunciamento da Universidade de Vigo (UVigo) para completar o proceso formal. Neste sentido, o reitor vigués, Manuel Reigosa, anunciou que o Consello da universidade se reunirá de maneira extraordinaria o martes para votar o acordo, despois de que a sesión prevista inicialmente para o 1 de decembro fose adiada pola situación xerada en Santiago.
No seu posicionamento público, a Xunta defende a descentralización como a “fórmula idónea” para garantir a “mellor formación” do estudantado e para optimizar os recursos e capacidades do sistema universitario galego en Santiago, Vigo e A Coruña. O acordo prevé que, por primeira vez, se poida cursar nas tres cidades todo o segundo ciclo da titulación, incluíndo tanto a docencia teórica como a formación práctica dos cursos de 4º, 5º e 6º.
O pacto tamén establece compromisos específicos para as universidades da Coruña e Vigo, que renuncian a presentar solicitudes para crear facultades propias de Medicina mentres non se complete o proceso de descentralización, previsto para o curso 2028/29. Esa opción só se reabriría no caso de que algunha das partes incumprise as cláusulas recollidas no acordo asinado.
