A corporación municipal de Santiago aprobou unha declaración institucional coa que chaman a “respectar a autonomía universitaria da USC” e demandan un “compromiso” a todas as institucións para alcanzar un acordo coa universidade compostelá que “peche o camiño” a novas titulacións en Galicia que sexan froito de “actuacións unilaterais”.
Este texto recibiu o visto e prace de todas as formacións representadas no pleno, BNG e Compostela Aberta –que gobernan en bipartito–, PP, PSOE e edilas non adscritas. Con el, expresan o apoio municipal á USC e á Facultade de Medicina “como referente docente e investigador no ámbito biosanitario”.
“O futuro da formación médica en Galicia require diálogo, consenso e planificación a medio e longo prazo”, defende a declaración institucional, que pide unha “actuación consensuada” de face á impartición descentralizada, así como garantir os dereitos do estudiantado.
Deste xeito, demandan que o alumnado conte con seguridade xurídica, voluntariedade na mobilidade e igualdade de condicións na avaliación e no seguimento académico.
O texto insiste no respecto da “autonomía universitaria” da USC e insta a todas as institucións a non tomar “decisións unilaterais” que afecten á “organización e calidade” dos estudos. Tamén lles esixe un “compromiso” de que calquera acordo coa USC “peche o camiño” a “actuacións unilaterais” de creación de novas titulacións ou estruturas docentes en Galicia.
