O IES Lamas de Abade, situado na zona leste de Santiago de Compostela, acometerá a partir de abril unha ampliación da súa á oeste para dar resposta ao incremento continuado de alumnado. O conselleiro de Educación, Román Rodríguez, visitou este martes o instituto acompañado do equipo directivo para coñecer os detalles dun proxecto que foi adxudicado a Marmitako Arquitectura e que suporá un investimento de 1,2 millóns de euros por parte da Xunta.
Segundo explicou o director do centro, José Bicada, a intervención —cun prazo estimado de execución de entre 10 e 12 meses— permitirá levantar un novo terceiro piso destinado a nove aulas, seis de maior tamaño e tres máis pequenas, estas últimas pensadas para grupos reducidos e desdobres. En total, habilitaranse 429 metros cadrados de novos espazos docentes.
Bicada subliñou que esta actuación chega “polo crecemento do barrio e pola evolución das matriculacións”, que nos últimos anos situaron o instituto en arredor de 1.100 estudantes entre ESO, Bacharelato e Formación Profesional. O aumento de liñas, iniciado hai tres cursos coa incorporación dunha aula adicional en 1º de ESO, obrigou ao centro a adoptar solucións provisionais para manter a actividade diaria.
Entre estas medidas destacou a división do taller de Tecnoloxía en dous espazos separados por unha parede de pladur —un arranxo que, en palabras do director, “non evita que se escoite todo”— e a modificación de horarios dalgúns ciclos. A aula de Debuxo tamén tivo que reutilizarse para clases ordinarias, complicando a organización de exames ao ter parellas de estudantes compartindo mesa. Con esta ampliación, o instituto recuperará “unha aula de tecnoloxía en condicións”, algo que o equipo docente e o alumnado recibiron “con moita satisfacción” por tratarse dunha “demanda de hai moito tempo”.
As novas aulas empregarase maioritariamente para ESO e Bacharelato, mentres que os espazos máis pequenos permitirán reforzar a atención a grupos fragmentados. A recuperación do taller é, segundo Bicada, outro dos obxectivos fundamentais dunha obra que se considera estratéxica para o funcionamento interno do centro.
En relación ás perspectivas de futuro, o director sinalou a vontade de que o Lamas de Abade continúe ampliando a súa oferta de Formación Profesional, especialmente na área sanitaria, e que poida dar resposta ao “crecemento global da FP” e á demanda de ciclos como o de Imaxe Persoal, que tamén imparten. “Fáltanos xente para traballar, e iso é un indicativo claro da necesidade de reforzar estas especialidades”, afirmou.
