A alcaldesa de Santiago, Goretti Sanmartín, enmarcou a reunión técnica prevista con Policía Local e Bombeiros na liña dos contactos mantidos nas últimas semanas. Así o indicou nunha entrevista en Onda Cero, na que asegurou que o goberno local levará a pleno o pagamento das horas extraordinarias realizadas e que existe vontade de canalizar outras demandas dos cadros, sempre “coa análise orzamentaria e os informes preceptivos”. A alcaldesa lembrou que recentemente se incorporaron nove axentes e que “nos vindeiros días” se sumarán seis máis, ademais de terse publicado as bases para cubrir catro prazas interinas en Bombeiros. O obxectivo a medio e longo prazo é incrementar o persoal para reducir as horas extra e estabilizar os servizos.
Tamén avanzou que o Concello procederá á retirada inmediata dos cadeados colocados na varanda que conecta a avenida de Raxoi coa Praza do Obradoiro. “É preciso actuar con axilidade para evitar o efecto chamada e coidar un patrimonio fráxil“, subliñou. A rexedora recalcou que o Consistorio actuará nos espazos públicos e que, no caso de elementos situados en propiedades privadas, contactará coas persoas responsables para a súa eliminación, en coherencia coas campañas municipais de sensibilización sobre o coidado do patrimonio.
A rexedora explicou que o Executivo municipal está a pechar o borrador dos orzamentos de 2026, que incluirá a asunción da xestión da depuradora a partir do verán e os incrementos necesarios ligados ás demandas de persoal. Sanmartín tamén fixo referencia ao debate sobre a taxa do lixo, lembrando que non prosperou en Santiago e que outros concellos da contorna si a aprobaron. “Con estes elementos faremos unha proposta de orzamentos”, dixo, apuntando que se abrirá a negociación coas concelleiras non adscritas e co PSOE para avaliar o cumprimento do acordo do pasado exercicio —Peleteiro, arranxos de rúas, imposto de estadías turísticas— e pactar novas actuacións.
Dentro do capítulo de investimentos, a alcaldesa destacou unha axuda de 14 millóns de euros que permitirá desenvolver a zona norte da cidade con proxectos de accesibilidade (como A Almáziga), infraestruturas ambientais, e novos equipamentos como unha factoría para a mocidade en Salgueiriños e un pavillón polideportivo. Esta operación terá financiación municipal complementaria e executarase por anualidades até 2029.
A alcaldesa respondeu ademais ás queixas veciñais pola velocidade do tráfico en varias rúas do Castiñeiriño e de Belvís. Reivindicou a necesidade de campañas de concienciación, control de tráfico e, se for preciso, sancións, ao tempo que defendeu non deter os arranxos viarios por medo a que aumente a velocidade: “Cómpre compatibilizar mantemento con medidas que garantan o calmado do tráfico“.
Sobre o Restollal, Sanmartín lembrou que existe unha memoria técnica elaborada polo goberno anterior e que as demandas veciñais reclaman ir máis alá. O Concello buscará financiamento externo para unha humanización en profundidade —“son demasiados carrís e cómpre mudar o modelo de circulación”— e, en paralelo, estuda actuacións a curto prazo asumibles con recursos propios.
