O Concello de Santiago completou a renovación integral do pavillón municipal do CEIP Quiroga Palacios, nunha intervención que supuxo un investimento total de 399.882,17 euros. As obras, iniciadas ao rematar o pasado curso escolar, aproveitaron os meses de verán para actuar tanto na mellora da cuberta como na ampliación e acondicionamento do recinto e do seu contorno.
A concelleira de Educación, Míriam Louzao, explicou que os traballos permitiron eliminar filtracións de auga e mellorar a estanquesidade e o illamento térmico do edificio, ademais de ampliar a accesibilidade con novas rampas que facilitan o acceso á cuberta, empregada tamén como espazo de xogo. “Estamos mellorando os espazos educativos para que todos os nenos e nenas poidan gozar deles, con maior habitabilidade e salubridade, e avanzando cara á accesibilidade universal”, afirmou Louzao, quen agradeceu a colaboración da dirección do centro, da ANPA e dos responsables da obra.
O concelleiro de Obras, Xesús Domínguez, precisou que a actuación incluíu a construción dun novo muro de formigón perimetral, substituíndo o antigo de ladrillo, así como a instalación dun cerramento metálico, a renovación do pavimento e da pista deportiva e o saneamento da fachada exterior. O proxecto incorporou tamén un sistema de illamento térmico e impermeabilización que mellora o comportamento enerxético do edificio.
En paralelo, continúa unha segunda fase que permitirá ampliar o aforo do pavillón de 100 a 399 persoas, mediante a adaptación dunha saída lateral como saída de evacuación ao exterior, conectada cunha rampla que salva o desnivel co viario.
Segundo destacou o Concello, estas actuacións cumpren un dobre obxectivo: mellorar a habitabilidade e salubridade do espazo deportivo municipal e facer do recinto escolar un lugar máis accesible, inclusivo e seguro.
Pola súa parte, o presidente da ANPA valorou positivamente a intervención, lembrando que levaban tempo solicitando melloras nas instalacións e asegurando que o Concello “cumpriu o compromiso que tiña”. Ademais, expresou a súa confianza en que a Administración autonómica avance agora na ampliación do centro educativo, tamén demandada pola comunidade escolar.
