O Concello de Santiago aclarou esta mañá que “non se cancelaron vacacións nin días de asuntos propios xa concedidos ao persoal da Policía Local”, desmentindo así as informacións que apuntaban a unha suspensión xeral destes dereitos laborais. Segundo indicou o departamento de Mobilidade e Convivencia, a decisión adoptada limítase unicamente a non autorizar novos permisos mentres non se poida garantir a cobertura dos servizos mínimos do corpo.
O executivo local explica que o xefe da Policía Local comunicou o pasado 30 de outubro a imposibilidade de garantir os servizos mínimos, debido á negativa do persoal a realizar horas extraordinarias. Esta situación afectaba, segundo o informe, á cobertura de postos sensibles para a seguridade cidadá, como a vixilancia da sala de pantallas, os atestados ou o mando operativo dos efectivos.
Ante esta circunstancia, o concelleiro de Mobilidade e Convivencia emitiu once instrucións de servizo para asegurar o funcionamento do corpo durante as noites do 30 e 31 de outubro e o 1 e 2 de novembro, datas de especial actividade pola celebración do Samaín. As ordes afectaban a un inspector, un oficial, catro policías de coordinación, un policía de atestados e catro oficiais, aínda que en catro dos casos os requirimentos non foron atendidos.
O Concello detalla tamén que “só dúas das instrucións implicaron a suspensión de permisos xa concedidos”, correspondentes a dous axentes chamados a cubrir quendas de noite o 5 de novembro. Fóra destas dúas situacións concretas, non se modificaron vacacións nin permisos previamente autorizados.
Dende o goberno municipal subliñan que as medidas adoptadas teñen carácter extraordinario e temporal, e que o obxectivo foi “garantir a capacidade operativa da Policía Local e a seguridade cidadá nunha situación non prevista”.
