A Facultade de Matemáticas da USC acollerá o vindeiro 22 de novembro a primeira Olimpíada Galega Feminina de Matemáticas, unha cita pioneira no país organizada pola Asociación Galega de Estudantes de Matemáticas (MaEGA) a través do proxecto ‘Aurias’, creado co obxectivo de impulsar a participación das rapazas neste ámbito científico.
A competición, dirixida a alumnas de 3º da ESO a 2º de Bacharelato, nace co propósito de ofrecer un espazo amigable e motivador onde as participantes poidan gozar das matemáticas, compartir experiencias e coñecerse entre si. Ademais da proba principal, o programa incluirá obradoiros e actividades complementarias, guiadas por profesoras da propia Facultade, que achegarán referentes femininos e reflexións sobre o papel das mulleres na ciencia.
Desde o equipo organizador de Aurias sinalan que “vimos que había unha participación moi reducida de rapazas neste tipo de competición. Queremos que vexan que as matemáticas tamén son para elas, que poden desfrutar, competir e atopar unha comunidade que as apoie”.
Esta primeira edición servirá tamén como fase clasificatoria para a Olimpiada Feminina Española de Matemáticas, que se celebra a nivel estatal. As inscricións permanecen abertas ata o 21 de novembro, a través da páxina web da USC.
