A Asociación de Antigos Alumnos e Amigos da Universidade de Santiago de Compostela (Alumni USC) e o Consello Social da USC veñen de abrir o prazo de presentación de candidaturas para unha nova edición do Premio Humanitas, co que se busca distinguir accións e traxectorias persoais ou colectivas destacadas polo seu compromiso solidario e humanitario.
O galardón ten como finalidade recoñecer iniciativas que contribúan á mellora da calidade de vida da comunidade, destacando valores como a empatía, a cooperación e a responsabilidade social. As propostas poderán formalizarse mediante escrito razoado, a través do rexistro electrónico da Universidade, e deberán ir dirixidas ao Consello Social antes do 28 de novembro de 2025, inclusive.
Segundo establecen as bases, poderán presentar candidaturas os membros do Consello Social, de Alumni USC e da propia comunidade universitaria, sempre que non formen parte do xurado encargado da selección.
O ditame final valorará especialmente aquelas traxectorias que mellor exemplifiquen o espírito do premio, centrado na solidariedade activa e no servizo á sociedade. O Premio Humanitas será único e indivisible, e a persoa ou entidade galardoada recibirá unha dotación económica de 2.000 euros.
