A Cámara de Comercio de Santiago de Compostela será sede os días 4 e 5 de novembro do encontro internacional ‘Blue Horizons: Youth Entrepreneurship in Action’, unha cita que reunirá arredor de cen mozos emprendedores, especialistas e representantes institucionais de toda a rexión atlántica europea co obxectivo de impulsar a innovación e o emprendemento sostible no ámbito da Economía Azul.
O evento enmárcase no proxecto europeo Atlantic InnoBlue Communities (ATLIC), cofinanciado polo Programa Interreg Espazo Atlántico a través do Fondo Europeo de Desenvolvemento Rexional (FEDER). Con un orzamento global próximo aos 3,5 millóns de euros, o proxecto busca crear unha comunidade piloto de innovación azul mediante laboratorios abertos, redes de transferencia de coñecemento e formación en competencias emprendedoras.
A apertura oficial contará coa presenza de María Rozas, concelleira de Dereitos e Servizos Sociais, Promoción Económica e Xuventude do Concello de Santiago; Fernando Pérez-Soba, representante da Cámara de Comercio; Sandra T. Silva, da autoridade de xestión do Programa Espazo Atlántico; Lara Meneses, da Dirección Xeral de Xuventude da Xunta de Galicia, e Beira Araújo, socia líder do proxecto ATLIC.
Durante as dúas xornadas celebraranse mesas redondas, talleres e presentacións que analizarán o papel da mocidade na economía do mar e as oportunidades de creación de emprego no sector azul. Entre as persoas participantes destacan Lorraine Thompson (Donegal Youth Service, Irlanda), Pablo Mariño (CEO de Bluscus), Muireann Kavanagh (activista da pesca artesanal) e mozos emprendedores procedentes de Francia, Portugal, Irlanda e España, que compartirán experiencias e boas prácticas.
O programa incluirá a ATLIC Open Academy, unha International Round Table sobre emprendemento xuvenil no Atlántico e a entrega dos Atlantic Innoblue Communities Awards, que recoñecerán os proxectos máis innovadores impulsados no marco do programa.
As actividades do primeiro día desenvolveranse no CERSIA Empresa, grazas á colaboración do Concello de Santiago, mentres que a segunda xornada trasladarase ao Parque Nacional Marítimo-Terrestre das Illas Atlánticas de Galicia e ao Porto de Vigo, onde se organizarán sesións prácticas e de networking.
Baixo o lema “Explora, aprende e descobre”, o encontro pretende motivar á mocidade atlántica a deseñar proxectos sostibles ligados ao mar, á innovación social e ao desenvolvemento das zonas costeiras e rurais, consolidando así a Santiago de Compostela como referente internacional no diálogo e na cooperación xuvenil atlántica.
