O Concello de Santiago de Compostela vén de realizar diversas melloras no cemiterio municipal de Boisaca ante o incremento de visitas previsto con motivo das festividades de Todos os Santos e Defuntos, os días 1 e 2 de novembro. As actuacións inclúen traballos de mantemento, limpeza e embelecemento das instalacións, así como un reforzo do transporte público e da atención ao público durante estas datas.
Entre as accións acometidas figura o pintado da capela, tanto no seu exterior coma no interior, e tamén dos aseos, xunto coa reparación do tellado. Ademais, efectuouse unha limpeza xeral das beirarrúas e do muro perimetral mediante máquina hidrolimpadora, eliminando herbas e acumulacións de sucidade. Os xardíns da rúa central foron renovados con novas plantas e flores ornamentais.
O Concello lembra que nos últimos meses tamén se realizaron traballos de mantemento ordinario, entre eles poda de árbores, achega de grava branca, e o reparado de pasos, muros e beirarrúas do recinto. Así mesmo, construíronse sete novas sepulturas para futuras concesións, e reforzouse o equipo de traballo municipal encargado do servizo.
Con motivo das festividades, o cemiterio de Boisaca permanecerá aberto desde o venres 31 de outubro ata o domingo 9 de novembro en horario de 09:00 a 19:00 horas, agás o sábado 1 de novembro, cando se ampliará ata as 20:00 horas.
O servizo de transporte urbano tamén se adaptará á afluencia de visitantes. A liña 1, que conecta o centro da cidade co cemiterio, reforzará a súa frecuencia de paso a 16 minutos entre as 09:00 e as 20:00 horas do 1 de novembro. O resto da xornada manterá a frecuencia habitual de domingos e festivos, con autobuses cada 30 minutos.
