O Parque de Bombeiros de Santiago de Compostela permaneceu este luns sen servizo operativo por falta de efectivos, segundo denunciaron os propios profesionais a través das redes sociais. A situación prodúcese despois dun fin de semana especialmente complicado, no que a coincidencia de dous incendios —un nunha hamburguesería do centro e outro nun vagón de tren na estación intermodal— puxo en evidencia a escaseza de persoal dispoñible para atender emerxencias simultáneas.
Segundo explicaron ao medio El Correo Gallego, o turno deste luns contaba unicamente con tres bombeiros de servizo, ningún deles con rango de mando, o que impide cumprir os procedementos internos que establecen mínimos obrigatorios en cada intervención.
Nunha publicación en Instagram, o corpo compostelán advertiu da gravidade da situación: “Por primeira vez desde 1921, o Parque de Bombeiros de Santiago de Compostela, capital de Galicia, cidade Patrimonio da Humanidade e centro de peregrinación mundial, permanece inoperativo por falta de persoal”. Engaden que, desde as 22:00 horas do domingo, “a cidade queda sen servizo de bombeiros operativo, deixando á súa sorte a veciños, visitantes e un patrimonio de valor incalculable”.
Os profesionais sinalan que esta circunstancia é consecuencia dunha “mala xestión prolongada no tempo” e da “falta de resposta ás reiteradas peticións de reforzo de persoal”. “É un feito sen precedentes en ningunha cidade galega”, aseguran, subliñando que “detrás de cada aviso que non se pode atender hai persoas que confían en nós, e bombeiros que queren facer o seu traballo pero non contan cos medios nin cos efectivos necesarios”.
