A Sección Sexta da Audiencia Provincial da Coruña, con sede en Santiago de Compostela, celebrará o vindeiro xoves o xuízo contra unha muller acusada dun delito de falsidade en documento público por tramitar de maneira fraudulenta varias subvencións da Xunta de Galicia, por un importe total de 102.380 euros, vinculadas aos programas ‘casas do maior’ e ‘casas niño’.
Segundo o escrito de acusación do Ministerio Fiscal, os feitos datan de agosto de 2018, cando a procesada incorporou de maneira ficticia sete persoas como socias dunha cooperativa, atribuíndolles unha achega económica de 200 euros a cada unha, extremo que non se axustaba á realidade. O documento notarial coas supostas sinaturas foi presentado, xunto coa documentación correspondente, no Rexistro Central de Cooperativas da Xunta de Galicia.
A Fiscalía sostén que a acusada creou contas de correo electrónico falsas a nome destas persoas para simular a súa identidade e manter comunicacións coa Administración autonómica. A través delas, tramitou cinco solicitudes de subvención, catro en municipios da provincia da Coruña e unha na de Lugo, por un valor conxunto superior aos cen mil euros.
A Xunta chegou a conceder as axudas, pero non chegou a efectuar o ingreso, ao detectar os inspectores autonómicos irregularidades nas sinaturas e documentación achegada. As comprobacións posteriores confirmaron que as rúbricas foran falsificadas.
En base a estes feitos, o Ministerio Público solicita para a procesada cinco meses de prisión, coa accesoria de inhabilitación especial para o exercicio do dereito de sufraxio pasivo durante o tempo da condena, así como unha multa de cinco meses cunha cota diaria de 12 euros, o que supón un total de arredor de 1.800 euros, con responsabilidade persoal subsidiaria en caso de impago.
O xuízo terá lugar nas dependencias da Audiencia con sede en Compostela, onde se valorará a documentación e os testemuños recollidos durante a investigación.
