A alcaldesa de Santiago de Compostela, Goretti Sanmartín, e o subdelegado do Goberno na Coruña, Julio Abalde, copresidiron este martes unha nova sesión da Mesa Local de Coordinación Interinstitucional contra a Violencia de Xénero, celebrada na capital galega. O encontro reuniu representantes de distintas administracións, forzas de seguridade e profesionais dos servizos sociais e sanitarios, co obxectivo de mellorar a atención ás vítimas e reforzar as accións de prevención.
Durante a sesión, analizouse o Sistema de Seguimento Integral dos Casos de Violencia de Xénero (VioGén), ferramenta dependente da Secretaría de Estado de Seguridade que permite a coordinación das actuacións e o control dos casos activos. Na provincia da Coruña, 27 concellos están xa adheridos ao programa e outros catro atopanse en proceso de incorporación.
No caso compostelán, o Centro de Información ás Mulleres (CIM) foi sinalado como espazo de referencia e punto de apoio esencial. Este servizo municipal ofrece atención psicolóxica, xurídica e social ás mulleres vítimas de violencia machista, ademais de desenvolver accións de sensibilización e prevención en colaboración con outras entidades locais.
Abalde lembrou que na provincia existen 43 mesas locais de coordinación, que abranguen un total de 53 concellos, e puxo en valor o Plan Director para a Convivencia e a Mellora da Seguridade nos Centros Educativos, iniciativa estatal que impulsa charlas formativas sobre igualdade, ciberdelitos e convivencia escolar impartidas pola Policía Nacional e a Garda Civil. O subdelegado destacou tamén a importancia de implicar ás familias e ás asociacións de nais e pais (AMPAS) nestes programas “para fomentar a educación en igualdade desde as primeiras etapas da vida”.
Finalmente, informouse de que o Ministerio de Igualdade asignou recentemente ao Concello de Santiago máis de 28.500 euros procedentes do Pacto de Estado contra a Violencia de Xénero, fondos que se destinarán a proxectos de apoio, acompañamento e sensibilización que se desenvolverán entre xullo de 2025 e xuño de 2026.
