A USC participa nun estudo internacional liderado pola Universidade de Exeter que advirte de que o planeta xa superou o seu primeiro punto de non retorno climático, ao estar o quecemento global a piques de rebasar os 1,5 °C. O informe, publicado este luns 13 de outubro, alerta de que a Terra se atopa agora “perigosamente preto” doutras situacións límite, como o retroceso irreversible das capas de xeo, a degradación do Amazonas ou o colapso de correntes oceánicas vitais.
Un dos exemplos máis visibles é o dos arrecifes de coral de augas cálidas, que están morrendo a un ritmo sen precedentes. Mesmo se a temperatura global se estabilizase en 1,5 °C, máis do 99 % destes ecosistemas poderían colapsar, segundo o documento.
Entre o grupo de 160 científicos e científicas de 87 institucións e 23 países que asinan o informe atópase o profesor Sebastián Villasante, director de EqualSea Lab (CRETUS-USC) e Investigador Distinguido de GAIN-Xunta de Galicia. O equipo está a colaborar coa Presidencia da COP30, que se celebrará en 2025 en Belém (Brasil), para garantir que os chamados “puntos de inflexión” climáticos sexan incorporados á axenda política global. A elección de Belém é especialmente simbólica por situarse no corazón da Amazonía, unha das zonas máis afectadas pola crise ambiental.
A pesar do panorama descrito, o estudo tamén destaca que “a solución está ao noso alcance”, sempre que a sociedade e os gobernos actúen de forma coordinada. As persoas autoras sinalan que o cambio só será posible se se combinan “valentía política, cooperación social e liderado global”, impulsando un “esforzo colectivo” —denominado Mutirão— para acelerar a acción climática.
O informe propón activar puntos de inflexión positivos, como a expansión das tecnoloxías verdes (solar, eólica ou vehículos eléctricos), que xa demostraron poder substituír opcións contaminantes por alternativas máis baratas e eficientes. Ademais, a acción política coordinada en sectores estratéxicos como a enerxía, o transporte e a calefacción podería xerar “cascadas de cambio positivo”, segundo recollen as conclusións.
Desde EqualSea Lab (USC) insisten en que a velocidade con que se están alcanzando estes límites é moito maior do previsto, e que o cambio necesario debe ser “sen precedentes, porque o que nos xogamos é a habitabilidade do planeta Terra”.
