A Federación de ANPAS de Santiago de Compostela (FANPA Compostela) celebrará o sábado 25 de outubro, entre as 10:00 e as 13:30, a xornada ‘Móbiles con sentido: acompañar e educar a adolescencia no seu uso’, un encontro dirixido a familias que buscan orientación ante un dos dilemas máis frecuentes da crianza actual: cando e como introducir o teléfono móbil na vida dos fillos e fillas. A actividade terá lugar na Facultade de Filoloxía da Universidade de Santiago de Compostela e contará coa colaboración de ANPAS Galegas.
O obxectivo principal é ofrecer ferramentas para comprender mellor o contexto dixital da adolescencia e favorecer un acompañamento baseado na confianza e no diálogo, afastado das posturas extremas que se limitan a prohibir ou permitir o uso do smartphone sen reflexión previa.
A xornada abrirase coa conferencia inaugural ‘Ser en Internet: adolescencias e vínculos na era dixital’, a cargo de Ricardo Fandiño Pascual, psicólogo clínico e coordinador xeral da Asociación para a Saúde Emocional na Infancia e a Adolescencia (ASEIA), ademais de profesor da USC.
A continuación celebrarase unha mesa redonda titulada ‘Móbiles e TICs nas familias, SOS! Unha ollada profesional’, moderada pola xornalista Laura Veiga. Intervirán Sonia González Rodríguez, presidenta do Colexio de Educadoras e Educadores Sociais de Galicia; unha representante do Colexio Oficial de Psicoloxía de Galicia; e Concepción Estévez Villar, presidenta de ASEIA.
O encontro concluirá ás 13:30 coa intervención de Esther Martínez, presidenta da FANPA Compostela, quen presentará as conclusións e despedirá o acto.
A participación é libre e gratuíta, mais require inscrición previa a través do formulario dispoñible en https://forms.gle/gdCuswW6mBF3kyts5 ata o 22 de outubro. Para facilitar a asistencia, a organización ofrecerá tamén un servizo de ludoteca gratuíto para crianzas, que deberá solicitarse no momento da inscrición.
Con esta proposta, a FANPA Compostela reforza o seu compromiso coa defensa da escola pública e coa creación de espazos de diálogo sobre os retos educativos actuais, convidando as familias a reflexionar sobre o papel dos dispositivos móbiles e o acompañamento emocional na era dixital.TEl
