A Praza do Obradoiro acolleu este venres a chegada dun grupo de estudantes e profesorado de ESO de distintos centros de Vilanova e Vilagarcía de Arousa, participantes na iniciativa ‘O teu Camiño’, promovida pola Fundación Galega contra o Narcotráfico (FGCN). O grupo foi recibido polo director da Sociedade de Xestión do Plan Xacobeo, Ildefonso de la Campa, quen lles deu a benvida ao final da súa etapa do Camiño, iniciada na Carballeira de Francos (Teo).
Durante o encontro, De la Campa destacou o valor educativo e social do proxecto, que combina o percorrido xacobeo co fomento da convivencia, o respecto, a solidariedade e os hábitos de vida saudable. Sinalou tamén que esta actividade “contribúe a achegar aos máis novos ao espírito e ás dimensións culturais, relixiosas, históricas e patrimoniais do Camiño de Santiago, así como ao seu valor paisaxístico”.
O programa ‘O teu Camiño’ terá continuidade a finais de novembro, cando se sumen estudantes de Cambados, Ribeira e A Estrada, entre outras localidades.
O director do Plan Xacobeo felicitou a Fundación Galega contra o Narcotráfico pola súa implicación na difusión dos valores xacobeos, que se manifesta non só nestas andainas, senón tamén noutras accións complementarias como exposicións fotográficas e un certame de relato curto, coas que se promove o compromiso social e educativo vinculado ao Camiño.
