A Hospedería San Martiño Pinario  acolleu este sábado unha nova edición do Encontro de Persoas Voluntarias de Fademga Plena Inclusión Galicia, unha xornada destinada a recoñecer o labor das persoas que colaboran coa federación e a reflexionar sobre o valor da solidariedade. O acto inaugural destacou o papel esencial do voluntariado como “unha das columnas vertebrais” da entidade, que sen esta colaboración “non podería facer nin a cuarta parte das actividades que se realizan”.

Baixo o lema ‘A fórmula da solidariedade’, a organización salientou que esta non é unha ecuación científica nin matemática, senón unha combinación de “tempo compartido, compromiso, alegría, empatía e, sobre todo, corazón”. O encontro, subliñaron, pretende ser “un espazo para recoñecer, compartir e aprender”, no que se poidan coñecer testemuños reais de persoas voluntarias e entidades como O Castro ou Aspronaga, ademais de actividades como a intervención de Gali Clown, centrada no humor como ferramenta de transformación social.

A sesión contou tamén coa participación de Pilar Lueiro, concelleira de Deportes do Concello de Santiago, quen interveu en nome da corporación municipal para dar a benvida ás persoas participantes. Lueiro lembrou a condición de Compostela como “cidade de acollida”, un espazo “de encontro, diálogo e confraternidade”, e destacou a importancia histórica do lugar onde se celebrou o acto, situado a carón do antigo Hospital Real, creado hai máis de cinco séculos para atender a quen precisaba coidado e curación.

A representante municipal fixo fincapé na continuidade dese espírito de axuda, adaptado aos novos tempos: “Mudan as necesidades, pero non muda a capacidade das persoas para contribuír a facer unha sociedade mellor”, afirmou. Lueiro quixo poñer en valor o traballo das entidades do terceiro sector, subliñando que “as Administracións imos sempre por detrás” e que “a maioría das loitas para acadar unha sociedade máis xusta e inclusiva débense a entidades como Fademga”.

A concelleira apelou tamén á necesidade de visibilizar as persoas con capacidades diferentes en todos os ámbitos públicos. Citou como exemplo a presenza de Fademga e da ONCE na Semana do Libro de Compostela (SELIC), onde xestionan un posto de libros accesibles e participan nun encontro de clubs de lectura fácil.

O acto de apertura rematou cun agradecemento a todas as persoas presentes polo seu compromiso e dedicación. “O voluntariado é unha rede viva que medra cada día grazas á implicación de persoas como vós”, destacou a organización, convidando a “seguir construíndo camiños compartidos e cheos de sentido”.