O Padroado do Refuxio de Bando aprobou por maioría absoluta (11 de 15 votos) a recomendación da veterinaria responsable para aplicar a eutanasia a tres cans considerados perigosos, un deles implicado no ataque rexistrado a semana pasada contra un traballador das instalacións. A decisión foi adoptada despois de analizar os informes veterinarios e de informar previamente dos feitos aos membros do organismo.
Segundo explicaron dende o Concello de Santiago, que ostenta a presidencia do padroado, o acordo inclúe tamén a actualización dos criterios que se viñan aplicando en casos deste tipo, para adecuarse á Lei estatal de Benestar Animal. A partir de agora, as actuacións de eutanasia deberán contar unicamente co informe técnico da veterinaria e co visto e prace da dirección do refuxio, sen necesidade de novos trámites adicionais.
O padroado tamén deu conta da decisión de ampliar as instalacións con dous novos canís de seguridade, que se sumarán ao xa existente, co obxectivo de mellorar a xestión dos animais con comportamento agresivo. Así mesmo, aprobouse a revisión e actualización do protocolo xeral de actuación, co fin de recoller nun único documento as normas e indicacións relativas ao manexo dos animais no centro.
Tanto o Concello de Santiago como a dirección do Refuxio de Bando lembraron que acompañaron dende o primeiro momento o traballador ferido no ataque e reiteraron o seu compromiso coa seguridade do persoal e co cumprimento das normativas vixentes en materia de benestar animal.
