Un total de 72 investigadores vinculados á Universidade de Santiago de Compostela aparecen na última actualización do Ránking de Stanford, a base de datos internacional que identifica ás traxectorias científicas máis influentes do mundo. O listado, elaborado a partir da información de Scopus, plataforma de referencias e citas científicas da empresa Elsevier, analiza máis de 200.000 carreiras investigadoras pertencentes a 22 campos científicos e 174 subcampos.
Nos dez primeiros postos composteláns destacan Juan José Nieto, Andrés Baselga, Juan C. Reboredo, María José Alonso, Arturo López Quintela, Néstor Armesto, Jesús F. Salgado, Jesús L. Romalde, Luis Botana e María Loureiro, representantes de áreas que van dende as ciencias experimentais ata a economía, a farmacoloxía ou a biomedicina.
O estudo, coordinado polo investigador John P. A. Ioannidis, chega á súa oitava edición e emprega un sistema de avaliación baseado en múltiples indicadores: número de citas acumuladas entre 1996 e 2024, índice h, índice hm axustado por coautoría, citas segundo a posición do autor nos traballos e un indicador composto (C-Score) que combina estes parámetros para ofrecer unha medida global da influencia científica.
A clasificación, publicada este mes de setembro de 2025, volve situar á USC como referente internacional na produción e impacto da investigación, recoñecendo o papel destacado do seu persoal científico no panorama mundial.
