A Sala do Civil e Penal do Tribunal Superior de Xustiza de Galicia (TSXG) ratificou a condena de tres anos de prisión imposta a un turista italiano pola agresión a dous peregrinos durante a madrugada de agosto de 2023 en Santiago de Compostela. O alto tribunal galego confirma así a sentenza ditada pola Audiencia Provincial da Coruña, que considerara ao acusado culpable de dous delitos de lesións, un deles agravado e outro leve.
Segundo o relato xudicial, o suceso tivo lugar cando o condenado, “moi alterado”, golpeou un vehículo mentres cruzaba a rúa e saltou sobre o seu capó, diante dun grupo de peregrinos. Ao ser recriminado, comezou a seguilos aos berros, ameazándoos de morte e, posteriormente, agrediu dous deles, un home e unha muller. A Sala sinala que ao primeiro propinoulle varias patadas na cabeza e no corpo, mentres se atopaba inconsciente no chan, e que á segunda a lanzou contra un escaparate.
O TSXG desestima os recursos de apelación presentados tanto pola defensa como pola acusación particular, que pedía unha condena por tentativa de homicidio ou asasinato. Os maxistrados consideran que os feitos probados non xustifican esa cualificación xurídica, polo que manteñen a pena inicial.
Ademais da condena de prisión, o agresor deberá indemnizar ás vítimas: unha delas con 16.627 euros, tras necesitar 223 días de recuperación, e a outra con 650 euros, ademais de pagar unha multa de 240 euros.
