O Concello de Santiago puxo en marcha este mércores, 10 de setembro, unha nova edición dos obradoiros de acollemento lingüístico, nos que participan persoas procedentes de países como Italia, Cuba, Brasil, Estados Unidos, Arxentina, Venezuela, Colombia ou de diferentes territorios do Estado español, como Cataluña, Castela e León ou Madrid.
As sesións celébranse nas dependencias do Espazo Apego e prolongaranse ata finais de ano en dúas quendas: pola mañá, para o nivel de iniciación, e pola tarde, para o de continuación. Os cursos, cunha duración de 36 horas, inclúen aprendizaxe básica da lingua e literatura galegas, así como contidos de historia, xeografía e organización administrativa. A programación pon especial atención na vinculación coa oferta cultural e de lecer da cidade, entendida como ferramenta de integración da nova veciñanza.
Cada quenda conta cun máximo de 25 prazas, polo que a elevada demanda fixo necesaria a creación dunha lista de agarda para cubrir posibles baixas. Desde o Departamento de Lingua subliñan que o interese por participar nestas actividades é crecente e que desde 2020 xa se inscribiron máis de 500 persoas.
Alén da aprendizaxe lingüística, os obradoiros pretenden servir como espazos de benvida e convivencia, favorecendo a cohesión social e recoñecendo a diversidade cultural das persoas participantes. A convocatoria realízase dúas veces ao ano —en primavera e outono— e non esixe requisitos legais de acceso, só a inscrición mediante un formulario. As persoas que completan a asistencia reciben un certificado de participación, válido para acreditar arraigo en determinados procesos de regularización administrativa.
As persoas interesadas en futuras edicións poden contactar co Departamento de Lingua do Concello para recibir información actualizada sobre prazos e inscrición.
