UCIN Santiago reclamou ao Concello que o novo contrato do servizo de transporte urbano incorpore medidas específicas para mellorar a accesibilidade das persoas cegas e con discapacidade visual. A formación lembra que o sistema actual segue a presentar limitacións importantes, como a ausencia de avisos sonoros, a falta de tecnoloxías adaptadas e a escasa formación do persoal condutor, o que supón un obstáculo diario para moitos usuarios e usuarias.
Entre as medidas que propoñen destacan a implantación de avisos sonoros automáticos no interior e exterior dos autobuses, que informen da liña e das paradas, así como a colocación de botóns en braille e en relevo para solicitar a baixada. Tamén defenden o uso de ferramentas como Navilens, un sistema xa empregado noutras cidades que permite identificar buses e paradas a través do móbil, e a posta en marcha de programas de formación dirixidos ao persoal condutor para mellorar a atención a persoas con discapacidade visual.
O coordinador local, Diego Adrián Mallo, sinalou que “un transporte público que non é accesible, non pode considerarse verdadeiramente público. Se queremos unha cidade inclusiva e xusta, debemos garantir que todas as persoas teñan as mesmas oportunidades de desprazarse con dignidade e autonomía”.
Desde UCIN Santiago subliñan que estas actuacións non suporían un investimento elevado e permitirían situar a capital galega como referente en accesibilidade, ao tempo que mellorarían de maneira significativa a calidade do servizo para toda a cidadanía.
