A conselleira de Vivenda, María Martínez Allegue, destacou que ela mesma contactou “persoalmente” coa alcaldesa de Santiago, Goretti Sanmartín, o día anterior para informarlle de que o martes “lle ía a chegar” un requirimento en relación coa petición para que a cidade sexa declarada zona tensionada.
Trátase dun requirimento “técnico”, segundo subliñou a preguntas dos xornalistas en rolda de prensa, despois da resposta de Raxoi a esta solicitude.
“Como todo o que facemos na Xunta, está baseado nos informes técnicos, igual que fixemos coa Coruña”, resaltou. Agora, engadiu, “o que terá que facer o Concello é cumprimentar ese requirimento para seguir coa tramitación correspondente”.
Respecto diso, rexeitou que o seu departamento busque “confrontación nin moitísimo menos”. E agregou: “Así llo trasladei á alcaldesa, á que lle dixen que os nosos técnicos están á súa disposición, se queren facer unha reunión, se precisaba colaboración”.
“OS PASOS ESTABLECIDOS”
Neste sentido, profundou en que os técnicos “son os que valoran esas solicitudes presentadas por calquera concello” xa que “son os que teñen que determinar que se ten que requirir adecuándose non só á normativa estatal, senón tamén á autonómica”, en referencia á que se fixo para dar desenvolvemento á lei.
“Se seguen eses pasos e a normativa establecida, Santiago será declarada zona tensionada. Se non os seguen, non será declarada zona tensionada”, resolveu.
Sobre se dará tempo de emendar isto antes de que termine o ano, respondeu que “iso depende da corporación municipal, de cumprimentar os requisitos”.
En todo caso, afirmou que “eses requisitos suporían unha modificación da memoria inicialmente exposta ao público” e por iso “o que se pide tamén é que unha vez cumprimentada vólvase a someter a exposición pública, para maior transparencia e coñecemento de toda a cidadanía”.
A XUNTA QUERE METER 1.300 VIVENDAS NO MERCADO DE ALUGUER
A Xunta trata de que 1.300 vivendas se incorporen ao mercado de aluguer mediante axudas a propietarios para reformas dos seus pisos e para seguros de falta de pagamento e multirrisco do fogar que poden chegar ata 16.000 euros. A contía total que destina a este programa o Goberno galego é de 5,7 millóns de euros ata 2028, cunha partida de case 1,02 millóns en 2025.
O Diario Oficial de Galicia (DOG) publica este xoves a resolución que establece as bases reguladoras da iniciativa, que se denomina ‘Fogar Vivo’. O prazo para pedir as axudas abre o próximo 18 de xullo, ás 9,00 horas, ata o 30 de outubro.
A finalidade é mobilizar “o maior número de vivendas baleiras para o mercado residencial”, segundo destaca a Consellería de Vivenda nun comunicado de prensa, aínda que en rolda de prensa a conselleira de Vivenda, María Martínez Allegue, e o director do Instituto Galego de Vivenda e Solo (IGVS), Heriberto García, apuntaron a estimación dunhas 1.300.
O prezo de aluguer mensual será “accesible”, con cinco tramos de topes segundo concello. Así, o importe máximo da renda mensual será de 700 euros na Coruña, Santiago, Vigo e Pontevedra; 650 en Ferrol, Lugo, Ourense, Vilagarcía e outro sete municipios; 600 noutros 14; 550 en 43 e 450 no resto da comunidade. Non haberá límite de superficie, polo que, por exemplo, os 700 euros de tope poderán cobrarse por un piso de escasos metros cadrados na capital galega.
Dos 16.000 euros por vivenda de axudas directas, 11.000 serán para rehabilitación e mellora, coa novidade de que se subvencionarán gastos para renovar electrodomésticos como a lavadora, o lavalouzas, o forno, a neveira, a campá extractora, a cociña e os sanitarios.
