O novo carril bici da rúa Roma xa está plenamente operativo despois de completarse os traballos de instalación dos elementos separadores que delimitan fisicamente o espazo reservado para bicicletas. A actuación forma parte da estratexia da Concellería de Mobilidade para promover desprazamentos sostibles e seguros, e conecta directamente co itinerario ciclista habilitado pola Xunta de Galicia en dirección ao barrio de San Lázaro, ao tempo que enlaza cos carrís xa existentes nas Fontiñas.
A intervención baseouse nun aproveitamento do ancho da calzada, especialmente no sentido de subida cara San Lázaro. Neste tramo, o novo carril bici quedou situado entre a zona de aparcamento e a beirarrúa, co que se xera unha barreira de protección fronte ao tráfico motorizado. En sentido contrario, cara ao centro da cidade, optouse por reorganizar os estacionamentos en espiña de peixe, o que permitiu case duplicar as prazas dispoñibles.
Unha das novidades máis salientables é a creación dunha zona de parada rápida “Bico e Vai” nas inmediacións do CEIP das Fontiñas, pensada para facilitar o acceso do alumnado aos centros escolares nos horarios de entrada e saída. Este espazo conta con 27 prazas delimitadas que só se poderán empregar temporalmente durante esas franxas horarias.
O acondicionamento do carril bici completouse coa instalación de elementos separadores cedidos pola empresa Zicla, nun xesto de colaboración con Compostela como cidade anfitrioa do 21º Congreso Ibérico ‘A bicicleta e a cidade’, organizado por ConBici. As persoas participantes neste encontro realizaron unha visita técnica á rúa Roma para avaliar sobre o terreo a funcionalidade e seguridade da nova infraestrutura.
Con esta actuación, o goberno local dá un novo paso no desenvolvemento dunha rede ciclable conectada, que busca integrar os distintos barrios da cidade mediante vías seguras e accesibles para as persoas que se desprazan en bicicleta.
