A Asociación de Veciños da Cidade Histórica FONSECA celebrou este luns a súa asemblea xeral ordinaria no Centro Sociocultural Maruxa e Coralia, onde aprobou as contas do exercicio 2024 e o orzamento previsto para 2025, ademais de facer balance do traballo realizado nos últimos meses.
Durante o encontro, revisouse a actividade da entidade desde a anterior asemblea, celebrada en novembro, con especial atención ás accións relacionadas co seguimento urbanístico na zona vella de Santiago. Neste sentido, a Asociación informou das queixas e denuncias presentadas diante do Concello, así como das reunións mantidas coa alcaldesa Goretti Sanmartín e membros do seu equipo de goberno ao longo dos últimos meses.
Segundo se trasladou aos socios, a actividade da Asociación tivo especial relevancia en debates normativos municipais, como a recente ordenanza dos residuos sólidos urbanos, á que presentaron alegacións formais, e tamén na revisión da ordenanza das terrazas, un asunto que —en opinión da entidade— require unha actualización urxente. Ademais, expuxeron as súas propostas na Mesa Sectorial da Vivenda, foro no que están a participar activamente.
Outro dos puntos destacados da asemblea foi a análise da recente decisión da Fiscalía de área de Santiago, que vén de formular unha querela penal para investigar a concesión dunha licencia a un local de hostalaría na zona histórica. A Asociación considera este paso un feito relevante na súa demanda de maior control urbanístico e transparencia administrativa.
