O Foro Cívico de Compostela, que agrupa diferentes entidades sociais, económicas e profesionais da cidade, mantivo este martes unha longa xuntanza co Goberno municipal, encabezado pola alcaldesa Goretti Sanmartín. O encontro serviu para avaliar o cumprimento dos compromisos asumidos polos grupos políticos no documento de consenso asinado en maio de 2023 e para abordar outras cuestións urxentes que afectan á cidade.
Entre os temas tratados destacou a situación da vivenda. O concelleiro de Urbanismo, Iago Lestegás, sinalou que xa se solicitou á Xunta a Declaración de Zona Tensionada para Santiago, o que permitiría aplicar medidas para aumentar o parque de vivenda accesible. Lestegás explicou que parte da vivenda pública existente perdeu esta condición e pasou ao mercado libre, o que provocou un incremento dos prezos. Como resposta, o Goberno local impulsará novas promocións: 3.460 vivendas previstas en Mallou, das cales un 20% serán públicas e un 60% estarán protexidas, cun horizonte de execución en 2028. Tamén se mobilizarán parcelas nas Cancelas, Muiña e Traspaxonal, e avógase porque o 100% da nova edificación na parcela do antigo colexio Peleteiro sexa vivenda protexida.
Outro dos puntos centrais foi a conectividade. A alcaldesa anunciou que a primeira fase da EDAR da Silvouta estará operativa en agosto e completamente rematada nun ano. Tamén confirmou a inauguración da Estación Intermodal neste verán, que pasará a chamarse Estación Daniel Rodríguez Castelao, aínda que o aparcadoiro vinculado non entrará en funcionamento ata dentro dun ano.
Porén, proxectos como o “orbitaliño”, que conectará a N-550 coa AP-9 para facilitar o acceso aos polígonos de Costa Vella e Tambre, ou a Plataforma Loxística de Mercadorías, seguen sen avances concretos. Neste sentido, o Foro demandou unha maior implicación para que Santiago se converta nun centro de distribución do norte peninsular, reclamando á Xunta máis solo industrial a prezo asumible e a creación dunha Oficina de Investimentos.
No tocante ao aeroporto Rosalía de Castro, os membros do Foro amosaron a súa preocupación pola perda de rutas e voos. A concelleira Miriam Louzao respondeu que, malia os bos datos xerais, o Goberno municipal está traballando para atraer novas aeroliñas como Wizz Air, co obxectivo de mellorar a conectividade e reducir os prezos. Tamén se abordou a necesidade de mellorar o acceso ao aeroporto por tren e de resolver a parálise na concesión de 29 novas licenzas de taxi, que non se prevé que estean dispoñibles ata finais de ano.
Outros temas que centraron a reunión foron a ampliación do aparcadoiro do CHUS, considerada positiva pero insuficiente polo Foro, ou a proposta de revisar o PXOM para facilitar a creación de novas infraestruturas e vivenda. En materia de emprendemento, Sanmartín adiantou que xa se está a estudar a cesión de espazos municipais a media ducia de proxectos xurdidos da Universidade de Santiago.
A xuntanza, que se prolongou por máis de dúas horas e media, serviu como canle de comunicación directa entre o Goberno local e as máis de quince asociacións representadas no Foro Cívico, que expuxeron as principais demandas e preocupacións da cidadanía compostelá.
