A convocatoria ordinaria da Proba de Acceso á Universidade (PAU) deu comezo este martes 3 de xuño en Galicia con 12.946 estudantes matriculados, dos cales 2.692 acoden a Santiago de Compostela, un dos puntos con maior concentración xunto con Vigo e A Coruña. Os exames estenderanse ata o xoves 5 e por vez primeira aplican un novo modelo común en todas as materias, deixando atrás as fórmulas máis flexibles introducidas durante a pandemia.
Na comarca compostelá, o maior volume de alumnado concéntrase nas facultades do campus sur, como Comunicación, Psicoloxía ou Bioloxía, onde se examinan mozos e mozas de centros como o IES Rosalía de Castro (Santiago), IES Cacheiras (Teo), IES Terra de Xallas (Santa Comba), Macías o Namorado (Padrón) ou IES da Pobra do Caramiñal. A sesión matinal arrincou ás 9:00 co reparto de indicacións e ás 10:00 tivo lugar o primeiro exame, Lingua Castelá e Literatura II.
O novo modelo de PAU, impulsado polo Ministerio de Educación e pactado por varias comunidades autónomas, entre elas Galicia, implica a desaparición dos modelos A e B, que ata o curso pasado permitían elixir entre exercicios diferentes. Agora, cada proba consta de catro preguntas, das cales a primeira é obrigatoria e as restantes ofrecen varios apartados a escoller.
A aplicación inmediata destes cambios xerou malestar entre o estudantado, que lamenta a falta de materiais para prepararse con garantías. “Non puidemos practicar apenas con exames similares”, comenta Manuel Dopazo, estudante do IES Rosalía de Castro, quen aspira a estudar Enxeñaría Informática. “Foi un cambio abrupto e sen transición”, engade. A súa compañeira Martina Domínguez, interesada en Relacións Internacionais, recoñece sentirse “moi nerviosa” antes da proba inicial, sentimento compartido pola maioría do alumnado ás portas dos centros.
A xornada do martes complétase con exames como Historia de España ou Filosofía, Bioloxía, Física ou segundas linguas estranxeiras. O mércores e o xoves será a quenda de materias como Matemáticas II, Lingua Galega e Literatura, Química ou Debuxo Técnico II, ata a conclusión das probas, prevista para o xoves ás 13:00. Os resultados estarán dispoñibles a partir do 12 de xuño.
A pesar das queixas, hai tamén quen encara o reto con máis serenidade. “Lévoo ben preparado”, aseguraba Xabier Trillo, tamén do Rosalía de Castro, que confía en acceder ao mesmo grao que Dopazo. Mentres, os docentes e orientadores advirten dunha posible baixada nas cualificacións, o que podería repercutir nas notas de corte das carreiras universitarias.
