A cidade de Santiago será o escenario da 13th Young Minds Leadership Meeting, un encontro internacional que reunirá os días 4, 5 e 6 de xuño a representantes da nova xeración de investigadoras e investigadores en física. Esta cita anual, promovida pola European Physical Society (EPS), celebrarase por segunda vez en España e contará coa participación de estudantes e persoal investigador mozo de máis de 30 universidades de Europa e o norte de África.
A organización local corre a cargo da sección Young Minds da USC, o chápter de OPTICA e a asociación estudantil Luzada, coa colaboración da Facultade de Física e dos centros de investigación IGFAE, CiTIUS e IMATUS. O obxectivo do encontro é fortalecer as redes internacionais, fomentar o liderado científico e conectar a física coa sociedade, combinando sesións científicas e formativas con actividades culturais e de benestar.
O evento arrincará o día 4 de xuño ás 19.30 horas cunha recepción oficial no Colexio de Fonseca, onde o público poderá coñecer parte da tradición galega a través da actuación das pandereteiras de Cantigas e Agarimos. As sesións científicas e profesionais desenvolveranse entre a Facultade de Física e o Instituto Galego de Física de Altas Enerxías (IGFAE) durante os días seguintes.
Entre as intervencións destacadas, inclúese a conferencia inaugural sobre cosmoloxía da presidenta da EPS, Mairi Sakellaeiadou, profesora no King’s College London, e unha charla sobre liderado científico do profesor Paulo J. Ferreira, do International Iberian Nanotechnology Laboratory. Ademais, docentes da USC como Victor Pardo e Meijian Li amosarán algúns dos avances da investigación en ciencia de materiais e física do universo primitivo.
O programa tamén aborda a relación entre academia e industria, cunha sesión titulada PhD to CEO na que participarán Bárbara Buades (MeetOptics, ICFO) e Pablo Cabanelas (Neutron Insights, USC). Outras sesións tratarán cuestións como os nesgos de xénero na intelixencia artificial, nun relatorio da investigadora Eva Cernadas (CiTIUS).
A saúde mental terá un espazo específico no programa, cun obradoiro práctico para o manexo do estrés, coordinado pola investigadora Ana López Durán e impartido por membros do Grupo de Avaliación e Tratamento das Adiccións e Trastornos do Estado de Ánimo da USC. A intención é dotar á mocidade investigadora de ferramentas para afrontar os retos psicolóxicos da carreira académica.
No ámbito da divulgación científica, haberá dúas sesións de pósters onde os participantes presentarán as súas mellores actividades Young Minds do ano. A mellor proposta será recoñecida cun premio da revista European Physics Letters, publicación oficial da EPS.
A dimensión social e cultural do evento completarase cunha cea no claustro de San Martiño Pinario e un concerto na Sala Sónar, a cargo da banda compostelá Ginko Biloba, integrada por estudantes e investigadoras da propia facultade de Física.
