As festas da Ascensión arrincaron este mércores en Compostela cunha forte aposta pola música dirixida ao público máis novo. A Praza da Quintana encheuse con milleiros de asistentes ao concerto Santiago 40 Pop, organizado coa colaboración de Los 40, que reuniu artistas de diversos estilos no que se converteu nun dos pratos fortes da primeira xornada festiva.
No cartel destacaron nomes como Depol, cabeza de lista co seu último sinxelo No lo sé ni yo; Ruslana, exconcursante de Operación Triunfo que presentou o seu Génesis Tour; ou os tinerfeños Adexe & Nau, cunha proposta entre o latino e o urbano. A eles sumáronse outros artistas como La Beba, Malva e a presenza galega de Javi Chapela, Awy e Leria, que abriron a noite con sonoridades que van do indie pop ao pop-rock. O evento foi presentado por Tony Aguilar, coñecido locutor musical, quen destacou que “cada ano buscamos dar visibilidade a artistas galegos e novas promesas que poden ser as cabeceiras de cartel do futuro”.
A pesar do bo ambiente vivido na Quintana, a mañá seguinte deixou tamén a outra cara da celebración: o campus Sur amenceu cuberto de lixo, unha imaxe que se repite tras as grandes concentracións xuvenís e xa se pode ver ano tras ano como símbolo da resaca das festas.
Coa noite inaugurada pola música pop, o xoves chega a xornada grande das festas, coa tradicional Feira Cabalar no recinto de Amio desde as 10.00 h, exhibicións de doma e o Gran Premio Dragones de Santiago, puntuable na Copa Galicia de Pura Raza Galega. Ás 12.00 h a Banda Municipal de Música actuará na Quintana xunto ao Obradoiro de Cultura Tradicional Ultreia, nun concerto dirixido por Casiano Maquieira. Pola súa banda, ás 12.30 h sairá a comparsa de cabezudos desde o Teatro Principal.
A tarde estará dedicada á música e ao baile tradicional nas principais prazas do casco histórico, con actuacións de Brincadeira, Cantigas e Agarimos, Colexiata do Sar e novamente Ultreia. O día rematará cun novo concerto multitudinario: ás 21.00 h, Tanxugueiras subirán ao escenario da Quintana, mentres que ás 22.00 h a orquestra Marbella amenizará a Alameda.
As festas prolongaranse ata o domingo, combinando propostas para todos os públicos e mantendo o equilibrio entre a música urbana, a tradición galega e os espazos de lecer familiares.
