O goberno municipal de Santiago deu luz verde á reurbanización da rúa Puente la Reina, situada no barrio de Vista Alegre, cun investimento de 394.536,54 euros (IVE incluído) e un prazo de execución de cinco meses. A empresa encargada da obra será ALCOMTE GALICIA SL, segundo se aprobou na xunta de goberno local do pasado 24 de marzo.
A intervención foi deseñada para reorganizar os usos do espazo urbano, prestando especial atención ao tránsito peonil, a mellora da accesibilidade, a pacificación do tráfico e a incorporación de infraestruturas verdes. A superficie afectada alcanza os 1.415 metros cadrados e a obra dividirase en dúas fases.
Un dos principais obxectivos é recuperar espazo público para a convivencia veciñal, reducindo o ancho do vial e ampliando as beirarrúas. Tamén se crearán dous pasos de peóns elevados, reorganizarase o aparcadoiro e instalarase unha faixa continua de arboredo. Nese espazo organizarase tamén o mobiliario urbano e colocaranse os contedores de lixo.
En canto ás redes de servizos, renovarase por completo a rede de saneamento, que pasará a ser separativa para augas pluviais e residuais, conectándose co sistema da rúa Batalla de Clavijo. Tamén se contempla o soterramento da cablaxe aérea de telecomunicacións e electricidade, e o desdobre da instalación de gas para facilitar futuras acometidas.
Antes do inicio da obra, o concelleiro de Vías e Obras, Xesús Domínguez, reuniuse o pasado 29 de abril cunha trintena de veciños e veciñas no centro sociocultural da Trisca, acompañado polo concelleiro de Mobilidade e Convivencia, Xan Duro, e por persoal técnico do Concello. Durante o encontro, explicouse o contido do proxecto e os seus obxectivos, incidindo na aposta por un espazo urbano máis accesible, funcional e ambientalmente mellorado.
Segundo declarou Domínguez, a obra comezará este luns, e seguirase o modelo de comunicación veciñal xa aplicado noutras intervencións como a da rúa do Pombal: “O Concello enviou información á veciñanza nos días previos para lembrar como se vai desenvolver a obra e cales son as canles de comunicación abertas durante os traballos”, afirmou.
O proxecto enmárcase na política municipal de transformación dos espazos públicos para dar prioridade aos usos sociais e peonís, coa intención de mellorar a calidade de vida no barrio e actualizar as infraestruturas urbanas existentes.
