A entidade Galzheimer Care presentará este martes en Santiago de Compostela a guía ‘Resolvendo problemas de conduta na casa’, un novo recurso pensado para apoiar a persoas coidadoras e familias que conviven con pacientes con alzhéimer ou outras demencias.
O acto terá lugar no marco dunha xornada divulgativa dirixida a coidadores e persoas próximas aos pacientes, co obxectivo de dotarlles de estratexias prácticas e accesibles para abordar no fogar os síntomas de conduta máis complexos asociados a esta doenza neurodexenerativa.
A guía, redactada cun linguaxe claro e directo, evita os tecnicismos médicos e busca facilitar a comprensión e a aplicación das propostas por parte da poboación xeral. Segundo sinalan desde a entidade promotora, a intención é que se converta nun manual de consulta útil no día a día, especialmente en situacións de crise ou de comportamento alterado por parte do paciente.
Desde Galzheimer Care destacan que esta publicación nace como resposta ás demandas detectadas entre coidadores non profesionais, moitos deles sen formación específica, que se enfrontan a episodios como alteracións do sono, episodios de agresividade, desorientación ou condutas repetitivas, entre outros.
Ademais de abordar cada situación con explicacións sinxelas, a guía achega suxestións para mellorar a convivencia e reducir a carga emocional e física das persoas coidadoras, que frecuentemente experimentan estrés, fatiga ou illamento social. O obxectivo, indican, é tamén coidar da saúde mental e o benestar de quen coida.
A presentación deste novo recurso terá lugar mañá martes no Centro Sociocultural do Ensanche, na rúa de Frei Rosendo Salvado, e estará aberta ao público. Desde a organización animan a todas as persoas interesadas a achegarse, tanto se están en contacto directo con pacientes como se desexan coñecer máis sobre o apoio a persoas con deterioro cognitivo.
