A sexta edición do Banquete de Conxo, en Santiago de Compostela, celebrarase o fin de semana do 23 ao 25 de maio na carballeira do barrio, segundo avanzou o Concello este luns, á vez que aprobou as bases da convocatoria para participar no Mercado do Libro que complementa a esta festa. Esta iniciativa acompaña a celebración, desde a praza de Aurelio Aguirre, cun amplo número de expositores dos sectores do libro.
Deste xeito, librarías, editoriais e outros sectores vinculados ao mundo do libro e da ilustración, interesados en expor os seus produtos no mercado, poderán presentar a súa solicitude mediante a sede electrónica do Concello. O prazo abrirase o día da publicación da convocatoria na mesma plataforma –entre martes e mércores– e durará ata o 5 de maio. Posteriormente, a selección realizarase en función da orde de entrada en rexistro, con prioridade para as persoas solicitantes con dirección social no municipio de Santiago de Compostela. Disporanse un máximo de 20 postos en carpas de 5 x 5 metros compartidas por máis dun posto.
