A concelleira do Partido Popular de Santiago, Olaya Otero, solicitou esta semana ao goberno municipal a reparación da estrada de Trasformarís, unha vía que conecta a N-550 co Polígono da Sionlla e que atravesa a zona de Sionlla de Arriba, soportando un tráfico crecente de vehículos, tanto lixeiros como de grande tonelaxe.
A edil popular asegurou que o estado da vía é especialmente preocupante, cualificándoa como unha especie de “autopista de alta perigosidade” debido ao seu deficiente firme, cheo de fendas, buratos e pedras soltas, e á ausencia de sinalización e protección en puntos sensibles, como as bocas de canalización de auga sen cubrir. Segundo explicou, trátase dunha vía rural “pensada para outro tipo de uso” que na actualidade soporta un fluxo de vehículos “moi superior ao previsto”.
Otero tamén denunciou a falta de beirarrúas practicables: “Naqueles tramos onde existen, a vexetación e o lixo acumulado fan imposible identificar que alí houbo un itinerario peonil”. Para a concelleira popular, esta situación compromete a seguridade das persoas que se desprazan a pé, tanto traballadoras do polígono como veciñanza da contorna.
A representante do PP afirmou que esta estrada leva anos sen recibir mantemento, e que a súa situación actual responde a un abandono institucional, polo que instou ao goberno municipal a intervir con urxencia, executando obras que inclúan un novo asfaltado, a limpeza e recuperación das beirarrúas e a dotación de elementos de seguridade viaria.
“As demandas da veciñanza son claras e levan tempo esperando unha resposta”, declarou Otero, quen convidou ao executivo local a visitar a zona para comprobar de primeira man o seu estado. A concelleira rematou lembrando que “a obriga do Concello é garantir o benestar da cidadanía, tamén nas áreas rurais do termo municipal”.
