A Praza do Obradoiro converteuse este xoves no escenario final do reto solidario ‘Pedaleando pola ELA’, unha iniciativa impulsada por persoas afectadas e sensibilizadas coa Esclerose Lateral Amiotrófica (ELA), que percorreu máis de 1.100 quilómetros desde o Hospital Vall d’Hebron de Barcelona ata Santiago de Compostela en bicicleta. A alcaldesa da cidade, Goretti Sanmartín, recibiu aos participantes xunto coa tenente de alcaldesa e concelleira de Servizos Sociais, María Rozas, e outros membros da corporación municipal.
Durante o acto de benvida, Sanmartín expresou o recoñecemento do Concello á iniciativa: “É magnífico que haxa iniciativas como esta, que unen o deporte coa loita contra as enfermidades”, sinalou, destacando o valor do evento tanto no plano simbólico como no práctico, ao contribuír a visibilizar a ELA e a fomentar o apoio á investigación médica e ao coidado das persoas afectadas.
A rexedora compostelá puxo tamén en valor a colaboración activa que o goberno local mantén con asociacións de persoas con ELA, Parkinson ou esclerose múltiple, e a necesidade de traballar conxuntamente co sistema sanitario, a universidade e outras administracións para avanzar na investigación e na mellora dos coidados: “Hai que poñer o foco tamén nas persoas coidadoras e promover un compromiso compartido”, dixo.
Ademais da alcaldesa e da primeira tenente de alcaldesa, participaron na recepción os concelleiros Manuel César (Persoal e Facenda), José Antonio Constainla e Olalla Otero (Partido Popular) e Gonzalo Muñoz, Emila Castro e Marta Álvarez (Grupo Socialista). A ampla representación institucional foi, segundo Sanmartín, “proba do apoio unánime do Concello a este tipo de causas”, nun xesto que busca recoñecer o esforzo das persoas participantes e reforzar a súa mensaxe solidaria.
Durante o acto, Sanmartín recibiu como agasallo un maillot conmemorativo do reto, que asegurou lucirá con orgullo, e fixo entrega aos participantes dun obsequio institucional en nome do Concello de Santiago.
A alcaldesa concluíu destacando o valor simbólico da chegada a Compostela: “Agardamos que esta non sexa a única vez que vos recibamos. Esta cidade será sempre a vosa casa, tamén na loita pola visibilización da ELA”.
