A Universidade de Santiago de Compostela acolleu este venres unha homenaxe póstuma ao catedrático de Dereito Romano Javier D’Ors Lois (1948-2024), un acto que reuniu alumnado, profesorado e colegas de profesión para lembrar a súa pegada na institución e a súa contribución á docencia.
O Salón de Graos da Facultade de Dereito encheuse de persoas que quixeron recoñecer a súa figura. O reitor da USC, Antonio López, destacou que a asistencia ao evento “testemuña o aprecio e recoñecemento por toda unha vida dedicada á docencia e á institución”.
No acto participaron compañeiros e compañeiras de distintas etapas da carreira académica do homenaxeado. A profesora de Dereito Romano da USC Marié Sixto da Silva cualificouno como “un profesor magnético que nos fixo sentir o Dereito e non só coñecelo”, en referencia á súa capacidade para transmitir coñecemento e paixón pola materia.
Tamén interviñeron a catedrática de Dereito Romano da Universidade dos Andes (Chile), Ángeles Soza Ried, e o catedrático da Universidade de Zürich (Suíza), José Luis Alonso Rodríguez, quen ofreceu a conferencia titulada ‘Ultra fines: insolvencia, papiroloxía e método orsiano’.
Pola súa banda, a profesora da USC Ana González Bustelo e a decana da Facultade de Dereito, Ana Gude Fernández, subliñaron a relevancia da súa figura na evolución do Dereito Romano na universidade e a súa influencia en distintas xeracións de estudantes.
A homenaxe contou coa adhesión de docentes de Dereito Romano de máis de vinte facultades de toda España, o que reflicte o impacto da traxectoria de Javier D’Ors Lois no ámbito académico.
A Facultade de Dereito recoñeceu así a contribución dun docente que marcou a formación de moitos estudantes e deixou un legado de admiración e respecto no ámbito xurídico e universitario.
